گجرات میں آج ہوگی جملوں کی بارش،راہول

نئی دہلی۔۔۔۔۔ وزیر اعظم نریندر مودی آج ایک بار پھر گجرات کے دورے پر جا رہے ہیں۔ یہ امید کی جا رہی ہے کہ وزیر اعظم وہاں کئی منصوبوں کا اعلان کر سکتے ہیں۔ وزیر اعظم کے اس دورے سے قبل راہول گاندھی نے ٹویٹر کے اکاؤنٹ پرتحریرکیا کہ ’’ موسم کا حال: چناؤ سے پہلے گجرات میں آج ہوگی جملوں کی بارش۔‘‘ وزیر اعظم مودی کا گزشتہ ایک ماہ کے دوران گجرات کا یہ چوتھا دورہ ہے۔عام طور پر دیکھنے میں آتا ہے کہ نریندر مودی انتخابات سے قبل عوام سے بے شمار وعدے کرلیتے ہیں جن کا اقتدار کی کرسی پر بیٹھنے کے بعد وہ ذکر بھی نہیں کرتے  ۔ہر ہندوستانی کے کھاتے میں 15 لاکھ روپے ڈلوانے کا وعدہ بھی ایسے ہی وعدوں میں سے ایک ہے   جو نریندر مودی نے عام انتخابات سے قبل کئے تھے۔عوام جب 15 لاکھ کی بات کرتے ہیں تو بی جے پی رہنما الجھن کا شکار ہوجاتے ہیں۔راہول گاندھی کے علاوہ رندیپ سرجے والا نےاپنے اکاؤنٹ پر ٹویٹ کیا کہ’’ 6.5 کروڑ گجرات کے بھائی بہنوں سے مودبانہ گزارش ہے ، آج چھاتا لے کر باہر نکلیں کیوں کہ جملہ کنگ آ رہے ہیں، کہیں بھی جملو ں کی بارش ہو سکتی ہے۔واضح رہے کہ ابھی گجرات  انتخابات کی تاریخوں کا اعلان نہیں ہواتاہم مودی گاندھی نگر میں’’گجرات گورو ‘‘یاترا کے اختتام پر منعقدہ تقریب سے خطاب کریں گے۔ راہول گاندھی گزشتہ دنوں سے سوشل میڈیا پرکافی سرگرم ہیں۔ ابھی حال ہی میں امریکی صدر ڈونلڈ ٹرمپ کے پاکستان کی تعریف کرنے والے بیان پر راہول نے ٹوئٹ کیاکہ ’’مودی جی جلدی کیجئے، لگتا ہے ٹرمپ کو ایک بار پھر گلے لگانے کی ضرورت آن پڑی ہے۔‘‘