اسحاق ڈار کی نگرانی ،سلطانی گواہ بننے کا خدشہ

اسلام آباد...سابق وزیراعظم نواز شریف نے وزیر خزانہ اسحاق ڈار کو سلطانی گواہ بننے سے روکنے کےلئے نگرانی شروع کر دی ۔ اسحاق ڈار کی ہر حرکت کو مانیٹر کیا جائے گا ۔ اسحاق ڈار سے ملنے والے افراد کا مکمل ریکارڈ رکھا جارہا ہے۔ اس کام پر ڈیوٹی سویلین ایجنسی کی لگائی گئی ہے۔ ذرائع نے بتایا کہ نواز شریف کو ڈر ہے کہ کہیں اسحاق ڈار احتساب عدالت میں ان کے خلاف کوئی گواہی ہی نہ دیں ۔ اسحاق ڈار ہی واحد شخص ہیں جو شریف خاندان کے بارے میں مکمل معلومات رکھتے ہیں۔ اسحاق ڈار زندگی کے مشکل مرحلہ سے گزار رہے ہیں ۔ مشرف دور میں 164کا بیان دے کر انہوں نے شریف خاندان کی منی لانڈرنگ کے بارے میں نیب کو بیان دیا تھا بعد میں اس بیان سے اسحاق ڈار یہ کہہ کر مکر گئے کہ انہیں خوفزدہ کر کے یہ بیان لیا گیا تھا۔ اب اگر وہ یہ بیان و اپس لیتے ہیں تو منی لانڈرنگ کے بارے میں حدیبیہ پیپر مل ازخود ری اوپن ہو جائے گا۔ بیان واپس نہیں لیتے تو شریف خاندان کے خلاف بیان ایف آئی آر کی حیثیت اختیار کر جائے گا۔ انہی حالات میں اسحاق ڈار سے نواز شریف سب سے زیادہ خوفزدہ ہیں ۔