امن کیلئے سیاسی تنازعات حل کئے جائیں، ملیحہ لودھی

نیویارک... اقوام متحدہ میں پاکستان کی مستقل مندوب ڈاکٹر ملیحہ لودھی نے کہا ہے کہ عالمی برادری کشمیر اور فلسطین کی عوام کے ساتھ ہونیوالی ناانصافیوں کو ختم کرے۔ اسلاموفوبیا اور تعصب کے گرد دیوار کھڑی کرنے کی ضرورت ہے۔ سیاسی تنازعات حل کئے بغیر دنیا میں دیرپا امن ممکن نہیں۔نیویارک میں جنرل اسمبلی سے خطاب کرتے ہوئے انہوں نے کہا کہ سیاسی و معاشی ناانصافیوں اور انسانی حقوق کی خلاف ورزیاں جاری رہیں تو امن قائم نہیں ہوسکتا ۔ عالمی برادری کشمیریوں اور فلسطینیوں کی عوام کے ساتھ ہونیوالی ناانصافیوں کو ختم کرے۔ کشمیریوں کی حالت زار پر دنیا بھر کا ضمیر بیدار ہونا چاہیے۔اقوام متحدہ کے چارٹر پر تاریخی ناانصافیوں کے کیس تاحال حل طلب ہیں۔انہوں نے کہا کہ امن کے بغیر پائیدار ترقی ناممکن ہے ۔ 20ویں صدی کی2 جنگوں کے خاتمے کے باوجود تنازعات و مصائب ختم نہیں ہوئے ۔21ویں صدی بھی مسائل اور مشکلات کا شکار ہے۔ اس کے لئے ہمیں ماضی کی ناکامیوں کو جدید دور کے مطابق حل کرنا ہوگا ۔